Regulært opptak 1. år

Om opptaket til masterstudiet i arkitektur ved Bergen Arkitekthøgskole, BAS . Søknadsfrist er 15. april.

BAS tar kvart år opp 30 nye studentar til 1. år. Opptaket til BAS er to-delt; søknad og intervju. Merk at opptak til BAS er lokalt, det vil seie at du må søkje direkte til skulen (ikkje via Samordna opptak).   

Opptaksprosess

Trinn 1, søknad:
Søknadsfrist 15. april. NB. Våren 2018 vert søknadar poststempla 16. april godkjend.
Stikkord er interesse, motivasjon, erfaring og refleksjon.
Obligatoriske vedlegg: Kopi av eksamensvitnemål og eit vedlegg «erfaringsoversyn» skal følgje søknaden. Ved manglande vedlegg kan søknaden vurderast som ugyldig. Søknadar sendt inn etter frist vert ikkje vurdert.  
Viss du skriv søknaden for hand, må du sørgje for at det er leselig.

Her kan du laste ned søknadsskjemaet.  

Søknad med vedlegg sendast til BAS, pb.39, 5841 Bergen. 
Dersom du sender det med bud, så er leveringsadressa BAS, Sandviksboder 59-61a, 5035 Bergen. 


Trinn 2, intervju:
På grunnlag av søknadsskjemaet kallar skulen inn til intervju. Dette er ein samtale med representantar for opptaksnemnda. Samtalen vil vere basert på søknaden din. Har du ein portofolio som  syner tidlegare arbeid, ta med denne til intervjuet.

Intervjua vert gjennomført medio-slutten av mai.

Alle korrespondanse til søkjarar i opptaksprosessen skjer per e-post.

 

Opptakskrav

Alle som har generell studiekompetanse, eller realkompetanse, kan vurderast for inntak.
For informasjon om utdanningsløp som kan gi generell studiekompetanse eller for generell informasjon om opptak til høgare utdanning, sjå http://www.samordnaopptak.no/info/opptak/ 
Du må sjølv dokumentera dette når du søkjer skulen. Viss du ikkje får vitnemål før sommaren, send med terminkarakterane dine.

Skulen er interessert i at studentane har mangfaldige erfaringar, men dette er altså ikkje eit absolutt krav:

Praktiske erfaringar frå byggeindustrien: at du har arbeidd på ein byggjeplass der du har gjort nytte av eit handtverksfag eller henta anna erfaring, som til dels frå båtbygging, verft.

Opplevingar frå andre land eller kulturar ut over feriereiser. Kontakten må vere av ein slik art at ein kan reflektere over ein annan kultur sin karakter og kvalitet.

Brei samfunnserfaring; helst gjennom arbeid eller praksis av seriøs art, til dels at ein har vore i ein heiltidsjobb i seks månader.

Har utøva eller har god innsikt i kunstens verden: frå musikk, dans, bildande kunst eller litteratur, berre for å nemne dei mest vanlege. Dette må representere ein skikkeleg innsats, ikkje berre hobbyverksemd no og då.

Det som er avgjerande er din motivasjon! Du må overtyde opptakskomiteen om at du verkeleg vil bli arkitekt, og at det er eit bevisst val å studere på BAS.

Det er positivt om du kan ta med portofolio til intervjuet, med teikningar og skisser av ting du har laga.

 

Vurdering og tilbod om plass

Søknaden og dei obligatoriske vedlegga dannar grunnlaget for å kalle inn 60 søkjarar til eit intervju. Det som tel i vurderinga av søknaden er interesse, motivasjon, erfaring og refleksjon. Høg interesse og motivasjon kan kompensere for manglande erfaring. Vi rår alle til å lese søknaden ein ekstra gong før innsending og la gjerne ein annan også lese den.
 

Til intervju stiller alle søkjarar likt. Intervjuet skal gje skulen ein sjans til å møte deg som person og sjå kva den einskilde søkjaren kan tilby klasses som heile. Den einskilde søkjaren vert altså vurdert på grunnlag interesse, motivasjon og erfaring men også på grunnlag av kva for eit bidrag søkjaren kan utgjere i den nye klassen. Mellom likestilte kandidatar vil motivasjon og underbygginga av denne vere det avgjerande.
Etter intervjua vil 30 søkjarar få tilbod om plass. 12-15 søkjarar vil få tilbod om å stå på venteliste, og vil eventuelt få tilbod om plass viss nokon seier frå seg plassen. Tilbod vert sendt ut rett i etterkant av intervjua.

BAS oppmodar alle dei som ynskjer å studere ved BAS, til å besøke skulen og slik få eit  bilete av skulen før ein eventuelt byrjar på studiet. Våren 2018 arrangerer BAS open dag 23. mars.


?UTGIFTER

BAS er ein privat høgskule, drive av ein stiftelse, og har frå hausten 2018 ei studieavgift på  kr. 16.432,- per semester/ kr. 32.864,- per år. I tillegg kjem avgift til Studentsamskipnaden og Kopinor-avgift. Ein må  og rekne med ein del ekstra utgifter til verktøy, material og til obligatoriske studieturar kvart år. BAS er godkjend i lånekassa.

 

Kort om BAS

BAS byrja å ta opp studentar i 1986 etter eit vedtak i Bergen Arkitektforening, og vart starta opp som eit fagleg og pedagogisk alternativ til dei andre to arkitektskulane i Noreg.
BAS er tildelt full eksamensrett av Det kongelige Kunnskapsdepartement (KD), og skulen er underlagt lov om private høgskolar.

Avsluttande eksamen frå skulen gjev rett til tittelen Master i Arkitektur og studentane er førehandsgodkjende som medlemmar av NAL (MNAL)

 

Meir informasjon om skulen og studiet finn du på www.bas.org. Du kan og lese boka BAS-alternativet, som kan kjøpas i administrasjonen eller lesast på skulens bibliotek.

Den fullstendige studieplanen kan ein få tilsendt ved å kontakta skulen, alternativt finn du den på nettsida vår.

 

PROGRAM

BAS ynskjer ei anna tilnærming til arkitektur. Personleg ansvar må utviklast i høve til morgondagens situasjon. Ein fagdidaktikk er utvikla, i kombinasjonen mellom den praktiske øvingssituasjonen, ei fri kunstnarisk tilnærming og dei teoretiske faga og er meint å utvikla arkitektar som ser arkitektarbeide som ein del av vår tids kultur og som kan gje form til vår tids samfunn.

Bygningen skal meir vere for mennesket og for dei menneskelege behov, enn eit konstruktivt objekt. Den einskilde studenten øver seg i å bruke deira eigne individuelle ressursar i møte med oppgåvene.

Arkitektonisk meining står i høve til samansette identitetar. Arbeidet til arkitekten er avhengig av kulturell forståing, lokal historie og forhold, og personleg inneleving.

Bygningshistoria skal vere ein inspirasjon til løysingar for vår tid.

Kunstnarisk tilnærming er avgjerande for å skape personleg ansvar gjennom sitt eige uttrykk. Å skapa og å byggja er eit mål, likeeins ein måte å øve og tenke på.

Å vere og arbeide i felten er ein metode og ein føresetnad, vinden, regnet og det sterke lyset må opplevast på kroppen og erfaringa ein får slik gløymer ein ikkje.

Målet med studiet er å øve visuelle uttrykk, å gje personleg erfaring og refleksjonsgrunnlag for å forme i samfunnet.  Sosial kommunikasjon er avhengig av personlege utrykk.

Personleg erfaring er lærdom for livet.

 

OPPBYGGING AV STUDIET

Studiet er 5 år og er organisert i to avdelingar, 3 år + 2 år.

Studiet avsluttas med ein hovudeksamen, etter 5 år, i form av eit avsluttande og kvalifiserande hovudarbeid, diplomarbeidet.

 

Fagleg sett er studiet delt opp i 4 faglege hovudområde som føreset integrering.

 

1.0.      Arkitektur - prosjektering og planlegging (APP)

            2.0.      Teknologi - teknikk og administrasjon (TTA)

            3.0.      «Den andre verden» - eit fagområdet for særskild og fri utvikling av skapande                 evner og personlege uttrykk (DAV)

            4.0.      Kompletterande teoretiske fag (KTF)

 

Arkitektur, planlegging og prosjektering er det mest omfattande fagområdet i studiet.

I dei tre fyrste år er kursa i APP, saman med kursa i fagområda teknologi og teknikk og «den andre verden» obligatoriske.

I dei to siste åra må studenten gjera val mellom kurs innan fagområdet APP, medan TTA og «den andre verden»-kurs vert lagde opp i høve til APP-kursa.

Dei teoretiske faga vart utvikla i samarbeid med UiB. Faga er utvalde i høve til planleggings- og arkitektarbeidet. Utvalet er i samsvar med den erkjenninga dei siste par tiåra har gitt oss. Dette gjeld særleg i høvet mellom person og samfunn, i det å planleggja og byggja for mange menneske, og unngå å øydeleggja det fysiske og økologiske miljøet. Viss ein har desse småfaga frå før kan ein få dette innpassa.

 

Undervisnings- og studieformane på BAS er varierte:

Feltarbeid og -øvingar

Litteraturstudiar

Formøvingar

Prosjektering med innleiande og indirekte innføringsoppgåver.

Rettleiingar, både individuelt og gruppevis

 

Arbeidet vert utført delvis i grupper, delvis individuelt

 

 

 

PERSONVERN
Målet med å samle inn og lagre dine personopplysningar er å gjere det mogleg for BAS å sakshandsame din søknad om opptak.
Innhenting av desse data har heimel i lov om universitet og høgskolar
Spørsmål om tryggleik og handsaming av personopplysningar retter du til administrasjonen på BAS, som har det daglege ansvaret for sakshandsaming.
Søknadar og vedlegg vert ikkje returnert til søkjar. Søknadar vert destruert etter avslutta opptak. 

 

OM BAS-ALTERNATIVET:

“Both the curriculum and the student work that I have seen at Bergen School of Architecture points towards an anthropological and ecological architecture, which is the most important direction that I think architecture should take advance in the current phase of western culture. A culture threatened by false techno-economic rationalism, consumerist materialism, shallow internationalism, and detachment of architecture and life at large from their mytho-poetic essence.” 

Juhani Pallasmaa, Finland
Professor i arkitektur

Rektor Fakultetet for arkitektur, Helsinki Polytekniske Univ. (1993)